ﺗﯜﺭﻛﯩﻴﻪﺩﻩ ﺷﯘﻧﺪﺍﻕ، ﺋﯘﻳﻐﯘﺭﺩﯨﻤﯘ ﺷﯘ

ﺋﺎﺑﺪﯗﯞﻩﻟﻰ ﺋﺎﻳﯘﭖ

ﺋﯘﻳﻐﯘﺭﻻﺭ ﺋﺎﺭﯨﺴﯩﺪﺍ ﺗﯜﺭﻛﯩﻴﻪ ﻛﯩﻨﻮﻟﯩﺮﻯ ﻣﻪﺳﺘﺎﻧﯩﻠﯩﻘﻰ ﻛﯚﺗﯜﺭﯛﻟﮕﻪﻧﺪﯨﻦ ﻛﯧﻴﯩﻦ ﺗﯜﺭﻛﯩﻴﻪﮔﻪ ﻗﯩﺰﻏﯩﻨﻠﯩﻘﻰ ﺯﯨﻴﺎﻟﯩﻼﺭ ﯞﻩ ﺋﯚﻟﯩﻤﺎﻻﺭ ﻗﺎﺗﻠﯩﻤﯩﺪﯨﻦ ﺋﺎﯞﺍﻡ ﺋﯘﻳﻐﯘﺭﻻﺭ ﺋﺎﺭﯨﺴﯩﻐﺎ ﻛﯧﯖﻪﻳﺪﻯ. ﻧﻪﺗﯩﺠﯩﺪﻩ ﺗﯜﺭﻛﭽﻪ ﺋﯚﮔﯩﻨﯩﺪﯨﻐﺎﻧﻼﺭ، ﺗﯜﺭﻛﯩﻴﻪﮔﻪ ﺳﺎﻳﺎﮪﻪﺗﻜﻪ ﭼﯩﻘﯩﺪﯨﻐﺎﻧﻼﺭ، ﺗﯜﺭﻛﯩﻴﻪ ﻣﺎﻟﻠﯩﺮﯨﻨﻰ ﺗﺎﻟﻼﭖ ﺳﯧﺘﯩﯟﺍﻟﯩﺪﯨﻐﺎﻧﻼﺭ ﻛﯚﭘﻪﻳﺪﻯ. ﺋﯘﻳﻐﯘﺭﺩﯨﻜﻰ ﺋﯘﻗﯘﻣﯘﺷﻠﯘﻗﻼﺭﻏﺎ ﺗﯜﺭﻛﻠﻪﺭ ﺑﯩﻠﻪﻥ ﺋﯘﻳﻐﯘﺭﻻﺭﻧﯩﯔ ﻣﯘﻧﺎﺳﯩﯟﯦﺘﻰ ﺋﺎﻳﺪﯨﯔ ﺑﻮﻟﻐﺎﻥ ﺑﯩﻠﻪﻥ ﺋﺎﯞﺍﻡ ﺋﺎﺭﯨﻤﺰﺩﯨﻜﻰ ﻣﯘﻧﺎﺳﯩﯟﻩﺗﺘﯩﻦ ﺗﻮﻟﯘﻕ ﺧﻪﯞﻩﺭﺩﺍﺭ ﺋﻪﻣﻪﺳﺘﻪﻙ ﻗﯩﻠﯩﺪﯗ. ﺗﯜﺭﻛﭽﻪ ﺩﻩﺭﺱ ﺋﯚﺗﯜﺵ ﺟﻪﺭﻳﺎﻧﯩﺪﺍ ﺑﺎﻳﻘﯩﺸﯩﻤﭽﻪ ﺋﻮﻗﯘﻏﯘﭼﯩﻼﺭ ﺗﯜﺭﻛﭽﯩﻨﯩﯔ ﮔﺮﺍﻣﻤﺎﺗﯩﻜﯩﺴﯩﻨﻰ ﺳﯚﺯﻟﯩﻤﯩﮕﯩﻨﯩﻤﺪﯨﻦ، ﺗﺎﯞﯗﺷﻼﺭﻧﯩﯔ ﺗﻪﻟﻪﭘﭙﯘﺯﯨﻨﻰ ﺋﺎﻳﺮﯨﻢ ﺋﯚﮔﻪﺗﻤﯩﮕﻪﻧﻠﯩﮕﯩﻤﺪﯨﻦ ﮪﻪﻳﺮﺍﻥ ﻗﯧﻠﯩﺸﺘﻰ ﮪﻪﺗﺘﺎ ﻧﺎﺭﺍﺯﻯ ﺑﻮﻟﯘﺷﺘﻰ. ﺋﯘﻳﻐﯘﺭﭼﻪ ﺑﯩﻠﻪﻥ ﺗﯜﺭﻛﭽﯩﻨﯩﯔ ﺋﻮﺭﺗﺎﻗﻠﯩﻘﯩﻨﻰ ﺗﺎﺭﯨﺨﯩﻲ، ﺋﻪﻣﻪﻟﯩﻲ ﻣﯩﺴﺎﻟﻼﺭ ﺑﯩﻠﻪﻥ ﺳﯚﺯﻟﻪﺵ ﯞﻩ ﺋﯘﻳﻐﯘﺭﭼﻪ ﺑﯩﻠﻪﻥ ﺗﯜﺭﻛﭽﻪ ﺋﻮﺗﺘﯘﺭﯨﺴﯩﺪﺍ ﮪﻪﺭ ﺑﯩﺮ ﺗﺎﯞﯗﺵ ﺋﻮﺗﺘﯘﺭﯨﺴﯩﺪﯨﻜﻰ ﺗﻪﻟﻪﭘﭙﯘﺯﯨﺪﺍ ﭘﻪﺭﻗﯩﻨﯩﯔ ﺋﺎﺳﺎﺳﻪﻥ ﻣﻪﯞﺟﯘﺩ ﺋﻪﻣﻪﺳﻠﯩﻜﯩﻨﻰ ﻣﯩﺴﺎﻟﻼﺭ ﺑﯩﻠﻪﻥ ﭼﯜﺷﻪﻧﺪﯛﺭﯛﺷﻠﻪﺭﺩﯨﻦ ﻛﯧﻴﯩﻦ ﻣﻪﺳﯩﻠﻪ ﺋﺎﻳﺪﯨﯖﻼﺷﺘﻰ.
ﺗﯜﺭﻛﯩﻴﻪ ﮪﻪﻗﻘﯩﺪﻩ ﺋﻮﻗﯘﻏﺎﻥ، ﻛﯚﺭﮔﻪﻥ ﯞﻩ ﺋﺎﯕﻠﯩﻐﺎﻧﻼﺭﻏﺎ ﻣﻪﻟﯘﻡ ﺑﻮﻟﻐﺎﻧﺪﻩﻙ ﺗﯜﺭﻛﻠﻪﺭ ﺑﯩﻠﻪﻥ ﺋﯘﻳﻐﯘﺭﻻﺭ ﻧﺎﮪﺎﻳﯩﺘﻰ ﻛﯚﭖ ﺋﻮﺭﺗﺎﻗﻠﯩﻘﻼﺭﻏﺎ ﺋﯩﮕﻪ. ﺑﯘﻧﺪﺍﻕ ﺋﻮﺭﺗﺎﻗﻠﯩﻖ ﺗﺎﺭﯨﺨﺘﯩﻜﻰ ﺋﻮﺭﺗﺎﻗﻠﯩﻖ، ﻣﻪﺩﻩﻧﯩﻴﻪﺗﺘﯩﻜﻰ ﺋﻮﺭﺗﺎﻗﻠﯩﻘﺘﯩﻼ ﺋﻪﻣﻪﺱ، ﮪﻪﺗﺘﺎ ﺑﯜﮔﯜﻧﻜﻰ ﺑﺎﺷﻘﯩﻼﺭﻏﺎ ﮪﻮﺟﯘﻡ ﻗﯩﻠﯩﺶ، ﮪﺎﻗﺎﺭﻩﺕ ﻗﯩﻠﯩﺶ، ﺋﯚﺯ ﻣﯩﻠﻠﯩﺘﯩﻨﻰ ﻛﻪﻣﺴﺘﯩﺶ ﺋﯘﺳﯘﻟﻠﯩﺮﯨﻤﯩﺰﺩﯨﻤﯘ ﺋﯩﭙﺎﺩﯨﻠﯩﻨﯩﺪﯗ.
ﺟﺎﺳﯘﺳﻘﺎ ﭼﯩﻘﯩﺮﯨﺶ
ﺗﯜﺭﻛﯩﻴﻪﺩﻩ ﺑﻪﺯﻯ ﺭﻩﮪﺒﻪﻟﻪﺭ، ﺋﯚﻟﯩﻤﺎﻻﺭ ﯞﻩ ﺯﯨﻴﺎﻟﯩﻼﺭ ﺑﯩﺮ ﺑﯩﺮﯨﮕﻪ ﮪﯘﺟﯘﻡ ﻗﯩﻠﺴﯩﺸﺴﺎ ﺑﯩﺮ ﺑﯩﺮﯨﻨﻰ ﺟﺎﺳﯘﺳﻘﺎ ﭼﯩﻘﯩﺮﯨﺸﯩﺪﯗ. ﻣﻪﺳﯩﻠﻪﻥ ﻓﻪﺗﮭﯘﻟﻼﮪ ﮔﯜﻟﻪﻧﺪﻩﻙ ﺗﯜﺭﻛﯩﻴﻪﺩﻩ ﻗﯘﺭﻏﺎﻥ ﻓﻮﻧﺪﻯ ﺟﻪﻣﺌﯩﻴﻪﺗﻠﯩﺮﻯ، ﭘﯜﺗﻜﯜﻝ ﺩﯗﻧﻴﺎﺩﺍ ﺋﺎﭼﻘﺎﻥ ﻣﻪﻛﺘﻪﭘﻠﯩﺮﻯ، ﺋﯩﺴﻼﻡ ﺋﯜﭼﯜﻥ ﻗﯩﻠﻐﺎﻥ ﺧﯩﺰﻣﻪﺗﻠﯩﺮﻯ، ﺩﯨﻨﻼﺭ ﺋﺎﺭﺍ ﺩﯨﻴﺎﻟﻮﮔﻨﻰ ﺗﻪﺷﻪﺑﺒﯘﺱ ﻗﯩﻠﻐﺎﻧﻠﯩﻘﻰ ﯞﻩ ﻳﻮﻝ ﺋﺎﭼﻘﺎﻧﻠﯩﻘﻰ، ﺋﯩﻨﺴﺎﻧﯩﻴﻪﺗﻨﻰ ﺗﯩﻨﭽﻠﯩﻖ، ﻣﯘﮪﻪﺑﺒﻪﺕ ﯞﻩ ﺋﺎﺯﺍﺩﯨﻠﯩﻚ ﺋﯩﭽﯩﺪﻩ ﻳﺎﺷﺎﺷﻘﺎ ﺋﯜﻧﺪﯨﮕﻪﻥ ﺗﻪﺭﻏﯩﺒﺎﺗﻠﯩﺮﻯ ﺑﯩﻠﻪﻥ ﺋﺎﻟﻘﯩﺸﻼﻧﻐﺎﻥ ﻛﯩﺸﯩﻨﻰ CIA (ﺋﺎﻣﯧﺮﯨﻜﺎ ﻣﻪﺭﻛﯩﺰﻯ ﺋﺎﺧﺒﺎﺭﺍﺕ ﺋﯩﺪﺍﺭﯨﺴﻰ) ﻧﯩﯔ ﺟﺎﺳﯘﺳﻰ ﺩﯦﻴﯩﺶ ﺗﯜﺭﻛﯩﻴﻪﺩﻩ ﺑﺎﺭ. ﻣﯘﻧﺪﺍﻕ ﺑﺎﺷﻘﯩﻼﺭﻏﺎ ﮪﻮﺟﯘﻡ ﻗﯩﻠﻐﺎﻧﺪﺍ ﺷﯘ ﻛﯩﺸﯩﻨﻰ ﺟﺎﺳﯘﺳﻘﺎ ﭼﯩﻘﯩﺮﯨﺪﯨﻐﺎﻥ ﻗﯩﻠﯩﻖ ﺑﻪﺯﻯ ﺋﯘﻳﻐﯘﺭﻻﺭﺩﯨﻤﯘ ﻣﻪﯞﺟﯘﺩ. ﮔﺎﮪﻰ ﺋﯘﻳﻐﯘﺭﻻﺭ ﻣﻪﻳﻠﻰ ﺋﺎﻣﯧﺮﯨﻜﯩﺪﻩﻙ ﻗﺎﻧﯘﻥ ﯞﻩ ﻗﺎﻧﯘﻧﻨﯩﯔ ﺋﯩﺠﺮﺍﺳﻰ ﻣﯘﻛﻪﻣﻤﻪﻝ ﺋﻪﻟﺪﻩ ﻳﺎﺷﯩﺴﯘﻥ ﯞﻩ ﻳﺎﻛﻰ ﭘﺎﻛﯩﺴﺘﺎﻧﺪﻩﻙ ﻗﺎﻧﯘﻧﻨﻰ ﻛﯧﺮﻩﻙ ﻗﯩﻠﻤﺎﻳﺪﯨﻐﺎﻥ ﺩﯙﻟﻪﺗﺘﻪ ﻳﺎﺷﯩﺴﯘﻥ ﺑﯩﺮ ﺑﯩﺮﯨﻨﻰ ﻳﺎﻗﺘﯘﺭﻣﯩﻐﺎﻥ، ﭘﯩﻜﺮﯨﻨﻰ ﺧﻮﺵ ﻛﯚﺭﻣﯩﮕﻪﻥ ﮪﺎﻣﺎﻥ ﻗﺎﺭﺷﻰ ﺗﻪﺭﻩﭘﻨﻰ ﺟﺎﺳﯘﺳﻘﺎ ﭼﯩﻘﯩﺮﯨﺪﯗ. ﻗﯩﺴﻤﻪﻥ ﺋﯘﻳﻐﯘﺭ ﯞﻩ ﺗﯜﺭﻙ ﺯﯨﻴﺎﻟﯩﻠﯩﺮﯨﻨﯩﯔ ﺳﯚﮪﺒﻪﺗﻠﯩﺮﯨﺪﻩ ﺋﯘﺯﺍﻗﺮﺍﻕ ﺑﻮﻟﻐﺎﻥ ﻛﯩﺸﻰ ﺳﯚﺯﻟﯩﮕﯜﭼﯩﻠﻪﺭﻧﯩﯔ ﺋﯚﺯﯨﺪﯨﻦ ﺑﺎﺷﻘﺎ ﻛﯚﭘﯩﻨﭽﻪ ﻛﯩﺸﯩﻨﻰ ﺟﺎﺳﯘﺱ ﺩﻩﭖ ﮔﯘﻣﺎﻥ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﺎﻳﻘﺎﻳﺪﯗ. ﻣﻪﺳﯩﻠﻪﻥ، ﻣﻪﻥ ﺋﺎﻣﯧﺮﯨﻜﯩﺪﺍ ﺋﯘﻳﻐﯘﺭﻧﯩﯔ ﺳﺎﺩﺍﺳﻰ ﺩﻩﭖ ﺗﻪﺭﯨﭙﻠﯩﻨﯩﯟﺍﺗﻘﺎﻥ ﺑﯧﻴﺠﯩﯖﺪﯨﻜﻰ ﺑﯩﺮ ﺋﯘﻳﻐﯘﺭ ﺯﯨﻴﺎﻟﯩﺴﯩﻨﻰ ﺑﯩﺮ ﻧﻮﭘﯘﺯﻟﯘﻕ ﺯﺍﺗﻰ ﻣﯘﺑﺎﺭﻩﻛﻨﯩﯔ»ﺋﯘﻧﯩﯔ ﺋﺎﻛﯩﺴﻰ ﺋﯧﻜﯩﺲ ﺷﻪﮪﺮﯨﻨﯩﯔ ﺳﺎﻗﭽﻰ ﺋﯩﺪﺍﺭﯨﺴﯩﺪﺍ ﺋﯩﺸﻠﻪﻳﺪﯗ، ﺋﯘ ﺟﺎﺳﯘﺱ ﺑﻮﻟﯘﺷﻰ ﻣﯘﻣﻜﯩﻦ» ﺩﯦﮕﻪﻧﻠﯩﺮﯨﻨﻰ ﺋﺎﯕﻠﯩﺪﯨﻢ. ﺋﯘﻧﺪﯨﻦ ﺑﺎﺷﻘﺎ ﺋﯘﻳﻐﯘﺭﻻﺭﺩﺍ ﺧﯘﺩﺩﻯ ﻓﺎﺗﮭﯘﻟﻼﮪ ﮔﯜﻟﻪﻧﻨﻰ ﺟﺎﺳﯘﺳﻜﻪﻥ ﺩﯦﺴﻪ ﺋﯩﺸﯩﻨﯩﺪﯨﻐﺎﻥ ﺋﺎﺩﻩﻡ ﭼﯩﻘﻘﺎﻧﺪﻩﻙ ﺗﯜﺭﻛﻠﻪﺭﺩﯨﻤﯘ «ﺋﯘﻳﻐﯘﺭﻻﺭﻧﯩﯔ ﯞﯨﺠﺪﺍﻧﻰ ﺋﺎﺗﺎﻟﻐﺎﻥ ﺋﯧﻜﯩﺲ ﺗﻮﺧﺘﻰ ﺟﺎﺳﯘﺱ ﺋﯩﻜﻪﻥ» ﺩﯦﺴﻪ ﺋﯩﺸﯩﻨﯩﭗ ﺗﺎﺭﻗﯩﺘﯩﺪﯨﻐﺎﻧﻼﺭ ﭼﯩﻘﯩﺪﯗ.
ﻳﺎﺗﻘﺎ ﭼﯩﻘﯩﺮﯨﺶ
ﺗﯜﺭﻛﯩﻴﻪﺩﻩ ﺑﯩﺮ ﺋﯘﻗﯘﻣﯘﺷﻠﯘﻕ ﻛﯩﺸﻰ ﺑﺎﺵ ﻛﯚﺗﯜﺭﮔﻪﻥ ﮪﺎﻣﺎﻥ ﺷﯘ ﻛﯩﺸﯩﻨﯩﯔ ﺩﯛﺷﻤﻪﻧﻠﯩﺮﻯ ﯞﻩ ﮪﻪﺳﻪﺗﭽﯩﻠﯩﺮﻯ ﺋﯘﻧﻰ ﺗﯜﺭﻙ ﺋﻪﻣﻪﺱ ﺩﻩﭖ ﺳﯧﺴﯩﺘﯩﺸﻘﺎ ﺋﺎﺭﺍﻥ ﺗﯘﺭﯨﺪﯗ. ﻣﻪﺳﯩﻠﻪﻥ ﺗﯜﺭﻛﯩﻴﻪﻧﯩﯔ ﺭﻩﺋﯩﺲ ﺟﯘﻣﮭﯘﺭﻯ ﺋﺎﺑﺪﯗﻟﻼﮪ ﮔﯜﻟﻨﻰ «ﺗﯜﺭﻙ ﺋﻪﻣﻪﺱ » ﺩﯦﮕﻪﻥ ﺧﻪﯞﻩﺭ ﭼﯩﻘﻘﺎﻧﺪﯨﻦ ﻛﯧﻴﯩﻦ ﺋﺎﺑﺪﯗﻟﻼﮪ ﮔﯜﻟﻨﯩﯔ ﭼﯜﺷﻪﻧﭽﻪ ﺑﻪﺭﮔﯩﻨﯩﻨﻰ ﺋﺎﯕﻠﯩﻐﺎﻧﻤﻪﻥ. ﺋﯘﻧﺪﯨﻦ ﺑﺎﺷﻘﺎ ﺯﯨﻴﺎ ﮔﯚﻛﺌﺎﻟﯩﭙﻨﻰ ﻛﯜﺭﺕ، ﻣﯘﺳﺘﺎﭘﺎ ﻛﻪﻣﺎﻝ ﺋﺎﺗﺎﺗﯜﺭﻛﻨﻰ ﺗﯜﺭﻙ ﺋﻪﻣﻪﺱ ﻳﻪﮪﯘﺩﻯ ﻧﻪﺳﻠﯩﺪﯨﻦ ﺩﯦﮕﻪﻥ ﮔﻪﭘﻠﻪﺭﮔﯩﻤﯘ ﺷﺎﮪﯩﺪ ﺑﻮﻟﻐﺎﻧﻤﻪﻥ. ﺗﯜﺭﻛﯩﻴﻪﺩﻩ ﺑﯩﺮ ﻛﯩﺸﯩﻨﻰ ﺳﯧﺴﯩﺘﻤﺎﻗﭽﻰ ﺑﻮﻟﺴﺎ ﺑﯩﺮ ﺑﻮﻟﺴﺎ ﻛﯜﺭﺕ ﻳﻪﻧﻪ ﺑﯩﺮ ﺑﻮﻟﺴﺎ ﻳﻪﮪﯘﺩﯨﻐﺎ ﭼﯩﻘﯩﺮﯨﺸﯩﺪﯗ. ﭼﯜﻧﻜﻰ ﺑﻪﺯﻯ ﺗﯜﺭﻛﻠﻪﺭ ﻣﯘﺳﯘﻟﻤﺎﻥ ﺑﻮﻟﯘﺵ ﺳﯜﭘﯩﺘﻰ ﺑﯩﻠﻪﻥ ﻳﻪﮪﯘﺩﯨﻼﺭﻧﯩﯔ ﺑﯘﺯﻏﯘﻧﭽﯩﻠﯩﻖ ﻗﯩﻠﯩﺪﯨﻐﺎﻧﻠﯩﻘﯩﻐﺎ ﺋﯩﺸﯩﻨﯩﺪﯗ. ﺋﯘﻧﺪﯨﻦ ﺑﺎﺷﻘﺎ ﺗﯜﺭﻛﯩﻴﻪﺩﻩ ﻛﯜﺭﺕ ﻣﻪﺳﯩﻠﯩﺴﻰ ﺳﻪﯞﻩﺑﻠﯩﻚ ﻛﯜﺭﺗﻠﻪﺭﮔﻪ ﺑﻮﻟﻐﺎﻥ ﺋﯚﭼﻤﻪﻧﻠﯩﻚ ﻣﻪﯞﺟﯘﺩ. ﺷﯘﯕﺎ ﺑﺎﺷﻘﯩﻼﺭﻧﻰ ﻛﯜﺭﺕ ﻳﺎﻛﻰ ﻳﻪﮪﯘﺩﻯ ﻧﻪﺳﯩﻠﻠﯩﻚ ﺩﯦﻴﯩﺶ ﺋﺎﺭﻗﯩﻠﯩﻖ ﻗﺎﺭﺷﻰ ﺗﻪﺭﻩﭘﻨﻰ ﺋﺎﺳﺎﻧﻼ ﺳﯧﺴﯩﺘﯩﺸﻘﺎ ﺑﻮﻟﯩﺪﯗ. ﺑﯘﻧﺪﺍﻕ ﻗﯩﻠﯩﺶ ﺋﯘﻳﻐﯘﺭﻻﺭﺩﯨﻤﯘ ﺑﺎﺭ. ﻣﻪﺳﯩﻠﻪﻥ ﺑﯩﺮ ﻣﻪﺷﮭﯘﺭ ﻛﯩﺸﯩﻤﯩﺰ ﺑﺎﺭ. ﻣﻪﻥ ﺑﻪﺯﯨﻠﻪﺭﻧﯩﯔ ﺷﯘ ﻛﯩﺸﻰ ﺋﯜﺳﺘﯩﺪﯨﻦ «ﺋﯘﻳﻐﯘﺭ ﺋﻪﻣﻪﺳﻤﯩﺶ» ﺩﯦﮕﻪﻥ ﮔﻪﭘﻠﻪﺭﻧﻰ ﺋﺎﯕﻼﭖ ﮪﻪﻳﺮﺍﻥ ﻗﺎﻟﻐﺎﻥ. ﺋﯘﻳﻐﯘﺭﻻﺭﺩﺍ ﺳﯧﺴﯩﺘﯩﻠﻐﯘﭼﻰ ﺧﻪﻧﺴﯘ ﺩﻩﭖ ﺳﯧﺴﯩﺘﯩﻠﯩﺪﯗ. ﺑﯘﻧﺪﺍﻕ ﺳﯧﺴﯩﺘﯩﺸﻨﯩﯔ ﺳﻪﯞﻩﺑﯩﻨﻰ ﺩﯦﻤﯩﺴﻪﻛﻤﯘ ﺋﻮﻗﯘﺭﻣﻪﻥ ﺑﯩﻠﯩﺪﯗ.
ﻛﺎﭘﯩﺮﻏﺎ ﭼﯩﻘﯩﺮﯨﺶ
ﺗﯜﺭﻛﯩﻴﻪﺩﻩ ﻛﻮﻣﯘﻧﯩﺴﺖ ﺩﯦﮕﻪﻧﻠﯩﻚ ﻛﺎﭘﯩﺮ ﺩﯦﮕﻪﻧﻠﯩﻚ ﺑﻮﻟﯘﭖ ﺋﯧﻐﯩﺮ ﺋﯧﻠﯩﻨﯩﺪﯗ. ﺷﯘﯕﯩﻤﯩﻜﯩﻦ ﺗﯜﺭﻛﻠﻪﺭﺩﻩ ﺋﯚﺯﻯ ﺋﺎﻧﭽﻪ ﻳﺎﻗﺘﯘﺭﻣﺎﻳﺪﯨﻐﺎﻥ ﺑﯩﺮ ﻛﯩﺸﯩﻨﻰ ﻛﻮﻣﯘﻧﯩﺴﺖ ﺩﯦﻴﯩﺶ ﺷﯘ ﻛﯩﺸﯩﻨﻰ ﺳﯧﺴﯩﺘﻘﺎﻧﻠﯩﻘﻘﺎ ﺑﺎﺭﺍﯞﻩﺭ. ﺑﯘﻧﺪﯨﻦ ﺑﺎﺷﻘﺎ ﺋﯩﺴﻼﻣﻐﺎ ﺑﻮﻟﻐﺎﻥ ﭼﯜﺷﻪﻧﭽﯩﺴﻰ ﭘﻪﺭﻗﻠﯩﻖ ﺑﻮﻟﻐﺎﻥ ﻛﯩﺸﯩﻠﻪﺭ ﺋﺎﺭﯨﺴﯩﺪﺍ ﺑﯩﺮ ﺑﯩﺮﯨﻨﻰ ﻛﺎﭘﯩﺮ، ﺧﯩﺮﯨﺴﺘﯩﻴﺎﻥ ﺩﻩﭖ ﮪﯘﺟﯘﻡ ﻗﯩﻠﯩﺸﻤﯘ ﺋﯘﭼﺮﺍﭖ ﺗﯘﺭﯨﺪﯗ. ﺋﯘﻳﻐﯘﺭﺩﺍ ﻛﺎﭘﯩﺮﻏﺎ ﭼﯩﻘﯩﺮﯨﺶ ﺗﯜﺭﻛﯩﻴﻪﺩﯨﻜﯩﮕﻪ ﺋﻮﺧﺸﺎﺷﻼ ﭼﯧﻠﯩﻘﺎﺭﻟﯩﻖ. ﻣﻪﺳﯩﻠﻪﻥ، ﻳﺎﺯﻏﯘﭼﻰ ﭘﻪﺭﮪﺎﺕ ﺗﯘﺭﺳﯘﻧﻨﯩﯔ ﻳﺎﻟﻘﯘﻥ ﺭﻭﺯﻯ ﺗﻪﺭﯨﭙﯩﺪﯨﻦ ﺧﺮﯨﺴﺘﯩﻴﺎﻧﻐﺎ ﭼﯩﻘﯩﺮﯨﻠﯩﺸﻰ، ﺷﺎﺋﯩﺮ ﺋﻪﮪﻤﻪﺗﺠﺎﻥ ﺋﻮﺳﻤﺎﻧﻨﯩﯔ ﺯﯗﻟﭙﯩﻘﺎﺭ ﺑﺎﺭﺍﺕ ﺗﻪﺭﭘﯩﺪﯨﻦ ﻛﺎﭘﯩﺮﻏﺎ ﭼﯩﻘﯩﺮﯨﻠﯩﺸﻰ ﻗﺎﺗﺎﺭﻟﯩﻘﻼﺭ.
ﻣﯩﻠﻠﻪﺗﻨﻰ ﻛﻪﻣﺴﺘﯩﺶ
ﺗﯜﺭﻛﯩﻴﻪﺩﯨﻤﯘ ﺋﯘﻳﻐﯘﺭﻻﺭ ﺋﺎﺭﯨﺴﯩﺪﺍ ﻣﻪﯞﺟﯘﺩ ﺑﻮﻟﻐﺎﻧﺪﻩﻙ ﺯﯨﻴﺎﻟﯩﻼﺭ ﺋﺎﺭﯨﺴﯩﺪﺍ ﻣﯩﻠﻠﻪﺗﻨﻰ ﻛﻪﻣﺴﯩﺘﯩﺶ ﻣﻪﺳﯩﻠﯩﺴﻰ ﻣﻪﯞﺟﯘﺩ. ﻛﻮﭼﯩﺪﺍ ﺑﯩﺮﺳﯩﻨﯩﯔ ﻛﯚﺯﯨﮕﻪ ﺑﯩﺮ ﺋﯩﺶ ﺳﯩﻐﻤﯩﺪﯨﻤﯘ ﺑﻮﻟﺪﻯ، «ﺗﯜﺭﻛﻠﻪﺭ ﺯﺍﺩﻯ ﺋﯘﻧﺪﺍﻕ، ﺯﺍﺩﻯ ﻣﯘﻧﺪﺍﻕ» ﺩﻩﭖ ﻗﺎﻳﻨﺎﭖ ﻛﯧﺘﯩﺸﯩﺪﯗ. ﺗﯜﺭﻛﻠﻪﺭﺩﯨﻜﻰ ﺑﯩﺮ ﻗﯩﺴﯩﻢ ﺯﯨﻴﺎﻟﯩﻼﺭ ﺋﺎﺭﯨﺴﯩﺪﺍ ﺗﯜﺭﻛﻠﻪﺭﻧﻰ ﻣﻪﯕﮕﯜ ﻳﺎﯞﺭﯗﭘﺎﻟﯩﻘﻼﺭﺩﯨﻦ ﺗﯚﯞﻩﻥ ﻛﯚﺭﯨﺪﯨﻐﺎﻥ ﭘﯩﺴﺨﯩﻜﺎ ﻣﻪﯞﺟﯘﺩ. ﺑﯘ ﭘﯩﺴﺨﯩﻜﯩﻨﻰ «ﭼﺎﻟﯩﻘﯘﺵ» ﺭﻭﻣﺎﻧﯩﻨﻰ ﺋﻮﻗﯘﻏﺎﻧﻼﺭ ﻳﺎﻛﻰ ﻣﻪﺯﻛﯘﺭ ﺭﻭﻣﺎﻧﻐﺎ ﺋﺎﺳﺎﺳﻪﻥ ﺋﯩﺸﻠﻪﻧﮕﻪﻥ ﻗﯩﺴﯩﻤﻠﯩﻖ ﭘﯩﻠﯩﻤﻨﻰ ﻛﯚﺭﮔﻪﻧﻠﻪﺭﮔﻪ ﻗﺎﺭﺍﯕﻐﯘ ﺋﻪﻣﻪﺱ. ﻣﻪﺷﮭﯘﺭ ﺗﯜﺭﻙ ﻳﺎﺯﻏﯘﭼﯩﺴﻰ ﺋﻪﺯﯨﺰ ﻧﻪﺳﯩﻦ «ﺗﯜﺭﻛﻠﻪﺭﻧﯩﯔ ﻳﯧﺮﯨﻤﻰ (ﺋﺎﭘﺘﺎﻝ) ﺩﯙﺗﺘﯘﺭ » ﺩﯦﮕﻪﻧﯩﻜﻪﻥ. ﯞﻩﮪﺎﻟﻪﻧﻜﻰ، ﺗﯜﺭﻛﯩﻴﻪﺩﯨﻜﻰ ﻣﯩﻠﻠﻪﺗﻨﻰ ﺳﯚﻛﯜﺵ ﺑﯩﻠﻪﻥ ﺋﯘﻳﻐﯘﺭﺩﯨﻜﻰ ﻣﯩﻠﻠﻪﺗﻨﻰ ﺳﯚﻛﯜﺵ ﺋﻮﺧﺸﯩﻤﺎﻳﺪﯗ. ﺗﯜﺭﻛﯩﻴﻪﺩﻩ ﻣﯩﻠﻠﻪﺗﻨﻰ ﺳﯚﻛﯩﺪﯨﻐﺎﻥ ﺯﯨﻴﺎﻟﯩﻤﯘ، ﺋﺎﺩﯨﻞ ﺗﻪﮪﻠﯩﻞ ﻗﯩﻠﯩﺪﯨﻐﺎﻥ ﺋﯩﻠﯩﻢ ﺋﻪﮪﻠﯩﻤﯘ، ﻣﻪﺩﮪﯩﻴﻪﻟﻪﻳﺪﯨﻐﺎﻥ ﺋﯚﻟﯩﻤﺎﻣﯘ ﻣﻪﯞﺟﯘﺩ. ﺋﻪﻣﻤﺎ ﺑﯩﺰﺩﯨﻜﻰ ﻣﯩﻠﻠﻪﺗﻨﻰ ﺳﯚﻛﯜﺵ ﺷﯘ ﻗﻪﺩﻩﺭ ﺋﻪﯞﺝ ﺋﺎﻟﺪﯨﻜﻰ ﺳﯚﻛﯜﺷﻜﻪ ﻗﺎﺭﺷﻰ ﺑﯩﺮ ﺋﯩﻨﻜﺎﺱ ﮪﺎﯞﺍﺳﻰ ﺷﻪﻛﯩﻠﻠﯩﻨﻪﻟﻤﯩﺪﻯ. ﺋﻪﮔﻪﺭ ﻣﯩﻠﻠﻪﺗﺘﻪ ﺋﯩﻠﻠﻪﺕ ﺑﻮﻟﯘﭖ ﮪﺎﺩﯨﺴﻪ ﺷﻪﻛﯩﻠﻠﻪﻧﺪﯛﺭﮔﻪﻥ ﺑﻮﻟﺴﺎ ﺑﯘ ﮪﺎﺩﯨﺴﯩﻨﯩﯔ ﺳﻪﯞﻩﺑﻰ، ﺟﻪﺭﻳﺎﻧﻰ ﯞﻩ ﺋﺎﻗﯩﯟﯦﺘﻰ ﮪﻪﻗﻘﯩﺪﻩ ﺗﯘﺗﺎﻣﻐﺎ ﭼﯩﻘﻘﯘﺩﻩﻙ ﺋﻪﺳﻪﺭ ﻳﺎﺯﯨﺪﯨﻐﺎﻧﻐﺎ ﺋﺎﺩﻩﻡ ﭼﯩﻘﻤﺎﻗﺘﺎ ﻳﻮﻕ، ﻛﯚﭘﯩﻨﭽﻪ ﻛﯩﺸﻰ ﺳﯚﻛﯜﺵ ﺩﻭﻟﻘﯘﻧﯩﻐﺎ ﺑﺎﺷﭽﯩﻼﭖ ﻛﯩﺮﯨﭗ ﻛﻪﺗﺘﻰ.
ﺑﯘﻻﺭﻧﯩﯔ ﺳﻪﯞﻩﺑﻰ ﻧﯧﻤﻪ؟
ﻣﯧﻨﻰ ﻗﯩﺰﯨﻘﺘﯘﺭﯨﺪﯨﻐﺎﻥ ﻣﻪﺳﯩﻠﻪ ﻛﯩﻤﻨﯩﯔ ﺗﯜﺭﻛﯩﻴﻪﺩﻩ ﯞﻩ ﻛﯩﻤﻠﻪﺭﻧﯩﯔ ﺋﯘﻳﻐﯘﺭﺩﺍ ﻛﺎﭘﯩﺮﻏﺎ، ﻳﺎﺗﻘﺎ ﯞﻩ ﺟﺎﺳﯘﺳﻘﺎ ﭼﯩﻘﯩﺮﯨﻠﻐﺎﻧﻠﯩﻘﻰ، ﻣﯩﻠﻠﻪﺗﻨﻰ ﻛﻪﻣﺴﯩﺘﻜﻪﻧﻠﯩﻜﻰ ﺋﻪﻣﻪﺱ، ﺑﻪﻟﻜﻰ ﺋﯘﻳﻐﯘﺭ ﺑﯩﻠﻪﻥ ﺗﯜﺭﻛﯩﻴﻪﺩﻩ ﺋﻮﺧﺸﺎﺵ ﺷﻪﻛﯩﻠﺪﻩ ﺋﻮﺗﺘﯘﺭﯨﻐﺎ ﭼﯩﻘﯩﺪﯨﻐﺎﻥ ﺑﯘ ﮪﺎﺩﯨﺴﯩﻨﯩﯔ ﺳﻪﯞﻩﺑﻰ، ﺋﺎﺭﻗﺎ ﻛﯚﺭﯨﻨﯩﺸﻰ ﯞﻩ ﺋﺎﻗﯩﯟﯦﺘﯩﺪﯨﻦ ﺋﯩﺒﺎﺭﻩﺕ. ﻣﻪﻧﭽﻪ ﺑﯘ ﻳﻪﺭﺩﻩ ﺑﯩﺮ ﻗﺎﻧﭽﻪ ﺋﻮﺭﺗﺎﻕ ﺳﻪﯞﻩﺏ ﺑﺎﺭ. ﺑﯩﺮﻯ ﺗﯜﺭﻛﯩﻴﻪ ﺟﯘﻣﮭﯘﺭﯨﻴﯩﺘﻰ ﻗﯘﺭﯗﻟﯘﺵ ﺑﯩﻠﻪﻧﻼ ﻳﯩﻠﺘﯩﺰ ﺗﺎﺭﺗﻘﺎﻥ ﺋﯩﺪﺩﯨﻴﻪ ﻣﯘﺳﺘﻪﺑﯩﺘﻠﯩﻜﻰ. ﺑﯜﮔﯜﻧﻜﻰ ﺗﯜﺭﻛﯩﻴﻪ ﺟﯘﻣﮭﯘﺭﯨﻴﯩﺘﻰ ﻗﯘﺭﯗﻟﻐﺎﻥ ﺩﻩﺳﻠﻪﭘﻜﻰ ﻣﻪﺯﮔﯩﻠﺪﻩ ﺗﯜﺭﻛﭽﯩﻠﯩﻚ ﺋﯩﺪﻭﻟﻮﮔﯩﻴﻪﺳﻰ ﻳﻮﻟﻐﺎ ﻗﻮﻳﯘﻟﯘﭖ ﺑﯘ ﻣﻪﺳﻠﻪﻛﻜﻪ ﺋﻮﺧﺸﯩﻤﺎﻳﺪﯨﻐﺎﻥ ﻣﻪﺳﻠﻪﻛﻠﻪﺭ ﺗﻪﻗﯩﭙﻠﻪﻧﮕﻪﻥ. ﺋﯘﻳﻐﯘﺭﺩﯨﻤﯘ ﻛﻮﻣﯘﻧﯩﺴﺘﯩﻚ ﺋﯩﺪﻭﻟﻮﮔﯩﻴﻪ ﺗﻪﺭﻏﯩﭗ ﻗﯩﻠﯩﻨﯩﭗ ﺑﺎﺷﻘﺎ ﺋﯩﺪﻭﻟﻮﮔﯩﻴﻪﻟﻪﺭﻧﯩﯔ ﺑﻮﻟﯘﺷﯩﻐﺎ ﻳﻮﻝ ﻗﻮﻳﯘﻟﻤﯩﻐﺎﻥ. ﺋﯩﻜﻜﻰ ﺭﺍﻳﯘﻥ ﻛﯩﺸﯩﻠﯩﺮﯨﻨﯩﯔ ﺷﺎﺭﺍﺋﯩﺘﯩﺪﯨﻜﻰ ﺑﯘ ﺧﯩﻞ ﺋﻮﺧﺸﺎﺷﻠﯩﻖ ﻛﯩﺸﯩﻠﻪﺭﻧﯩﯔ ﻛﺎﻟﻠﯩﺴﯩﻐﺎ ﺋﯩﺪﺩﯨﻴﻪ ﻣﯘﺳﺘﻪﺑﯩﺘﻠﯩﻜﯩﻨﯩﯔ ﺋﯘﺭﯨﻘﯩﻨﻰ ﭼﯧﭽﯩﯟﻩﺗﻜﻪﻥ ﺑﻮﻟﯘﺷﻰ ﻣﯘﻣﻜﯩﻦ. ﮔﻪﺭﭼﻪ ﺗﯜﺭﻛﯩﻴﻪﺩﻩ ﺑﯘﻧﺪﺍﻕ ﺋﯩﺪﺩﯨﻴﻪ ﻣﯘﺳﺘﻪﺑﯩﺘﻠﯩﻜﻰ 60-ﻳﯩﻠﻼﺭﺩﯨﻦ ﻛﯧﻴﯩﻦ ﺗﻪﺩﯨﺮﯨﺠﻰ ﺋﺎﺧﯩﺮﻟﯩﺸﯩﯟﺍﺗﻘﺎﻥ ﺑﻮﻟﺴﯩﻤﯘ ﺷﯘ ﻣﻮﮪﯩﺘﺘﺎ ﻳﺎﺷﯩﻐﺎﻥ، ﺗﻪﺭﺑﯩﻴﻪﻟﻪﻧﮕﻪﻥ ﻛﯩﺸﯩﻠﻪﺭ ﺑﯘﻧﺪﺍﻕ ﻣﯘﺳﺘﻪﺑﯩﺘﻠﯩﻜﻨﻰ ﮪﯧﻠﯩﻐﯩﭽﻪ ﺩﺍﯞﺍﻡ ﻗﯩﻠﻤﺎﻗﺘﺎ. ﺗﯜﺭﻙ ﺟﻪﻣﺌﯩﻴﻪﺗﺸﯘﻧﺎﺳﻰ ﺯﯨﻴﺎ ﮔﯚﻛﺌﺎﻟﯩﭙﻤﯘ ﺑﯘ ﮪﻪﻗﺘﻪ «ﻣﯩﻠﻠﯩﻴﻪﺕ ﺗﻪﺭﺑﯩﻴﻪﻧﯩﯔ ﻧﻪﺗﯩﺠﯩﺴﻰ» ﺩﻩﻳﺪﯗ. ﻗﺎﺭﯨﻐﺎﻧﺪﺍ ﺑﯩﺮ ﻣﯩﻠﻠﻪﺕ ﻛﯩﺸﯩﻠﯩﺮﻯ ﻗﺎﻧﺪﺍﻕ ﻣﻮﮪﯩﺘﺘﺎ ﻳﯧﺘﯩﻠﮕﻪﻥ، ﺗﻪﺭﺑﯩﻴﻪ ﺋﺎﻟﻐﺎﻥ ﺑﻮﻟﺴﺎ ﻣﯩﻠﻠﻪﺗﺘﻪ ﺷﯘ ﺩﻩﯞﯨﺮﮔﻪ ﻣﺎﺱ ﻣﯩﻠﻠﻪﺗﻠﯩﻚ ﺧﯘﺳﯘﺳﯩﻴﻪﺕ ﮪﺎﺯﯨﺮﻻﻧﺴﺎ ﻛﯧﺮﻩﻙ. ﻣﯧﻨﯩﯔ ﺑﺎﻳﻘﯩﺸﯩﻤﭽﻪ ﺗﯜﺭﻛﯩﻴﻪ ﻣﺎﺋﺎﺭﯨﭙﯩﺪﺍ ﺗﯜﺭﻛﭽﯩﻠﯩﻚ ﺋﯩﺪﻭﻟﻮﮔﯩﻴﻪﺳﯩﻨﯩﯔ ﻣﺎﺋﺎﺭﯨﭙﻘﺎ ﺋﺎﺭﯨﻠﯩﺸﯩﯟﯦﻠﯩﺶ ﻣﻪﺳﯩﻠﯩﺴﻰ ﻣﻪﯞﺟﯘﺩ. ﺧﯘﺩﺩﻯ ﺟﯘﯕﮕﯘﺩﺍ ﺋﻮﻗﯘﻏﯘﭼﯩﻼﺭ ﺩﯙﻟﻪﺕ ﺑﺎﻳﺮﯨﻘﯩﻐﺎ ﻗﺎﺭﺍﭖ ﻛﻮﻣﯘﻧﯩﺴﺘﯩﻚ ﻗﻪﺳﻪﻡ ﻗﯩﻠﻐﺎﻧﺪﻩﻙ ﺗﯜﺭﻛﯩﻴﻪﺩﯨﻤﯘ ﺋﻮﻗﯘﻏﯘﭼﯩﻼﺭ ﺗﯜﺭﻙ ﺑﺎﻳﺮﯨﻘﻰ ﺋﺎﻟﺪﯨﺪﺍ ﻣﯩﻠﻠﻪﺗﭽﯩﻠﯩﻚ ﻗﻪﺳﯩﻤﯩﻨﻰ ﺑﯧﺮﯨﺪﯗ.
ﻳﻪﻧﻪ ﺑﯩﺮ ﺳﻪﯞﻩﺏ ﺷﯘﻛﻰ، ﻣﻪﻳﻠﻰ ﺗﯜﺭﻛﯩﻴﻪ ﺟﻪﻣﺌﯩﻴﯩﺘﻰ ﺑﻮﻟﺴﯘﻥ ﻳﺎﻛﻰ ﺟﯘﯕﮕﯘ ﺟﻪﻣﺌﯩﻴﯩﺘﻰ ﺑﻮﻟﺴﯘﻥ ﺷﻪﺧﺴﻠﻪﺭﻧﯩﯔ ﻣﯘﺗﻠﻪﻕ ﮪﯚﺭﻟﯜﻛﯩﯩﻨﯩﯔ ﺩﻩﺧﯩﻠﺴﯩﺰﻟﯩﻜﻰ ﺋﯜﺳﺘﯩﮕﻪ ﻗﯘﺭﯗﻟﻐﺎﻥ ﺑﻮﻟﻤﺎﺳﺘﯩﻦ ﺑﻪﻟﻜﻰ ﻣﻪﻧﯩﺴﻰ ﺗﻮﻟﯩﻤﯘ ﺋﺎﺑﯩﺴﺘﯩﺮﺍﻛﯩﺖ ﺑﻮﻟﻐﺎﻥ ﻛﻮﻟﻠﯩﻜﺘﯩﭙﯩﻨﯩﯔ ﻣﻪﻧﭙﻪﺋﻪﺗﺘﯩﻜﻰ ﮪﻪﻣﻜﺎﺭﻟﯩﻘﻰ ﺋﯜﺳﺘﯩﮕﻪ ﻗﯘﺭﯗﻟﻐﺎﻥ. ﺑﯜﮔﯜﻧﻜﻰ ﺗﯜﺭﻛﯩﻴﻪ ﺟﯘﻣﮭﯘﺭﯨﻴﯩﺘﯩﻨﯩﯔ ﺋﯩﺪﺩﯨﻴﻪ ﺋﺎﺳﺎﺳﯩﻨﻰ ﻗﯘﺭﻏﺎﻥ ﺯﯨﻴﺎ ﮔﯚﻛﺌﺎﻟﯩﭗ ﻓﺮﺍﻧﺴﻮﺯ ﺟﻪﻣﺌﯩﻴﻪﺗﺸﯘﻧﺎﺳﻰ ﺩﻭﺭﻛﯩﻴﯩﻤﻨﯩﯔ «ﻛﻮﻟﻠﯩﻜﺘﯩﭙﻨﯩﯔ ﮪﺎﻳﺎﺗﻰ ﺷﻪﺧﺴﻨﯩﯔ ﮪﺎﻳﺎﺗﯩﺪﯨﻦ ﻣﻮﮪﯩﻢ» ﺩﯦﮕﻪﻥ ﺋﯩﺪﺩﯨﻴﻪﺳﯩﻨﻰ ﻗﻮﺑﯘﻝ ﻗﯩﻠﻐﺎﻥ. ﺑﯘﻧﺪﺍﻕ ﺋﯩﺪﺩﯨﻴﯩﻨﻰ ﺋﺎﺳﺎﺱ ﻗﯩﻠﻐﺎﻥ ﺟﻪﻣﺌﯩﻴﻪﺕ ﻗﯘﺭﯗﻟﻤﯩﺴﯩﺪﺍ ﺷﻪﺧﺴﻨﯩﯔ ﺋﯩﺪﺩﯨﻴﻪﺩﯨﻜﻰ ﺧﺎﺳﻠﯩﻘﻰ، ﺋﯩﺠﺎﺩﯨﻴﻠﯩﻘﻰ ﯞﻩ ﮪﯚﺭﻟﯩﻜﻰ ﺑﻮﻏﯘﻟﯩﺪﯨﻐﺎﻧﻠﯩﻘﻰ ﮔﯘﻣﺎﻥ ﻗﻮﺯﻏﯩﻤﯩﺴﺎ ﻛﯧﺮﻩﻙ. ﺋﯘﻳﻐﯘﺭﻻﺭ ﻳﺎﺷﯩﻐﺎﻥ ﺟﻪﻣﺌﯩﻴﻪﺗﺘﯩﻜﻰ ﻛﻮﻟﻠﯩﻜﺘﯩﭙﻨﯩﯔ ﯞﻩ ﺷﯘ ﻛﻮﻟﻠﯩﻜﺘﯩﭙﻘﺎ ﯞﻩﻛﯩﻞ ﺑﻮﻟﻐﺎﻥ ﺩﯙﻟﻪﺗﻨﯩﯔ ﻗﯘﺩﺭﯨﺘﻰ ﺋﺎﻟﺪﯨﺪﺍ ﺷﻪﺧﺴﻨﯩﯔ ﻧﻪ ﮪﺎﻟﺪﺍ ﺋﯩﻜﻪﻧﻠﯩﻜﻰ ﮪﺎﺯﯨﺮ ﮪﯩﭻ ﺑﯩﺮ ﺋﯘﻳﻐﯘﺭﻧﯩﯔ ﺋﻪﻗﻠﯩﮕﻪ ﻣﻪﺧﭙﯩﻲ ﺋﻪﻣﻪﺱ. ﺑﯘﻧﺪﯨﻦ ﺑﺎﺷﻘﺎ ﻣﯘﺷﯘﻧﺪﺍﻕ ﻣﯘﺳﺘﻪﺑﯩﺖ ﺗﯜﺯﯛﻡ ﮪﯚﻛﯜﻣﺮﺍﻧﻠﯩﻘﯩﺪﯨﻜﻰ ﺟﻪﻣﺌﯩﻴﻪﺗﺘﻪ ﺋﻪﯞﺝ ﺋﺎﻟﯩﺪﯨﻐﺎﻥ ﺗﻪﺑﯩﻘﯩﭽﯩﻠﯩﻚ، ﮔﻮﺭﯗﮪﯟﺍﺯﻟﯩﻖ، ﺳﻪﻣﯩﻤﯩﻴﻪﺗﺴﯩﺰﻟﯩﻚ، ﮪﯚﺭﻣﻪﺗﯩﺴﺰﻟﯩﻚ، ﮔﯘﻣﺎﻧﺨﻮﺭﻟﯘﻕ، ﭘﯜﭼﻪﻛﻠﯩﻚ ﯞﻩ ﻣﺎﺩﺩﯨﭙﻪﺭﻩﺳﻠﯩﻜﻠﻪﺭﻣﯘ ﻳﯘﻗﺎﺭﻗﯩﺪﻩﻙ ﺑﯩﻨﻮﺭﻣﺎﻝ ﮪﺎﺩﯨﺴﯩﻠﻪﺭﮔﻪ ﺳﻪﯞﻩﺏ ﺑﻮﻟﯘﯞﺍﺗﻘﺎﻥ ﺑﻮﻟﯘﺷﻰ ﻣﯘﻣﻜﯩﻦ.
ﻣﻪﻧﭽﻪ ﺋﯘﻳﻐﯘﺭ ﺑﯩﻠﻪﻥ ﺗﯜﺭﻛﯩﻴﻪﺩﯨﻜﻰ ﻳﯘﻗﺎﺭﻗﻰ ﻗﯩﻠﯩﻘﻼﺭﺩﺍ ﭘﻪﺭﻕ ﺑﺎﺭ ﺩﯦﻴﯩﻠﺴﻪ ﺋﺎﻗﯩﯟﯦﯩﺘﻰ ﭘﻪﺭﻗﻠﯩﻖ. ﺗﯜﺭﻛﯩﻴﻪﺩﻩ ﻗﺎﻧﯘﻧﻼﺭ ﺳﻪﻝ ﻣﯘﻛﻪﻣﻤﻪﻟﺮﻩﻙ، ﻗﺎﻧﯘﻧﻨﯩﯔ ﺋﯩﺠﺮﺍﺳﻰ ﺋﯘﻳﻐﯘﺭ ﺋﺎﭘﺘﻮﻧﯘﻣﺪﯨﻜﯩﺪﻙ ﺗﯜﺭﻟﯜﻙ ﺗﺎﺷﻘﻰ ﺋﺎﻣﯩﻠﻼﺭﻧﯩﯔ ﺩﻩﺧﻠﯩﺴﯩﮕﻪ ﻛﯚﭖ ﺋﯘﭼﺮﯨﻤﺎﻳﺪﯗ. ﺷﯘﯕﺎ ﺗﯜﺭﻛﯩﻴﻪﺩﻩ ﺋﯘﻳﻐﯘﺭﺩﯨﻜﯩﺪﻩﻙ ﺋﯩﺪﻭﻟﻮﮔﯩﻴﻪ ﺯﻭﺭﺍﯞﺍﻧﻠﯩﻘﯩﻨﯩﯔ ﮪﯘﺟﯘﻣﯩﻐﺎ ﺋﯘﭼﺮﯨﻐﯘﭼﯩﻨﯩﯔ ﮪﺎﻳﺎﺗﻰ ﻣﯘﺩﮪﯩﺶ ﺧﻪﯞﭘﺘﯩﻦ ﺳﻪﻝ ﺧﺎﻟﯩﺮﺍﻕ. ﺋﻪﻣﻤﺎ ﺋﯘﻳﻐﯘﺭ ﺟﻪﻣﺌﯩﻴﯩﺘﯩﺪﻩ ﺑﺎﺷﻘﯩﻼﺭ ﺗﻪﺭﭘﯩﺪﯨﻦ ﻛﺎﭘﯩﺮﻏﺎ ﭼﯩﻘﯩﺮﯨﻠﻐﺎﻥ، ﺧﯩﺮﯨﺴﺘﯩﻴﺎﻧﻐﺎ ﭼﯩﻘﯩﺮﯨﻠﻐﺎﻧﻼﺭﻧﯩﯔ ﮪﺎﻟﻰ ﺋﯩﻨﺘﺎﻳﯩﻦ ﺋﯧﭽﯩﻨﯩﺸﻠﯩﻖ.
ﺋﯘﻳﻐﯘﺭ ﺑﯩﻠﻪﻥ ﺗﯜﺭﻛﯩﻴﻪ ﺗﯜﺭﻛﻠﯩﺮﯨﺪﯨﻜﻰ ﺑﯘﻧﺪﺍﻕ ﺋﻮﺭﺗﺎﻗﻠﯩﻘﻼﺭﻧﻰ ﻳﯧﺰﯨﺸﺘﯩﻜﻰ ﻣﻪﻗﺴﻪﺩ، ﺑﯩﺰﻧﯩﯔ ﻛﯚﺯﯨﻤﯩﺰﮔﻪ ﺋﯘﻳﻐﯘﺭﻧﯩﯖﻼ ﺋﯩﻠﻠﯩﺘﻰ ﻛﯚﺭﯛﻧﯩﯟﺍﺗﻘﺎﻥ ﻣﻪﺳﯩﻠﻪ ﺋﻪﻣﻪﻟﯩﻴﻪﺗﺘﻪ ﺋﯘﻳﻐﯘﺭﻏﺎ ﺋﻮﺧﺸﺎﺵ ﻗﯩﺴﻤﻪﺗﻨﻰ ﺑﺎﺷﺘﯩﻦ ﻛﻪﭼﯜﺭﮔﻪﻥ ﻣﯩﻠﻠﻪﺗﻠﻪﺭﮔﻪ ﺋﻮﺭﺗﺎﻕ ﺋﯩﻜﻪﻧﻠﯩﻜﯩﻨﻰ ﻳﻮﺭﯗﺗﯘﺷﺘﯘﺭ. ﺑﯩﺰﺩﻩ ﺗﻪﻧﻘﯩﺪﻟﯩﻨﯩﯟﺍﺗﻘﺎﻥ ﺋﯘﻳﻐﯘﺭ ﺑﯩﻠﻪﻥ ﻣﻪﻥ ﻛﯚﺭﮔﻪﻥ ﺋﻪﺭﻩﺑﯩﺴﺘﺎﻧﻠﯩﻖ ﺋﻪﺭﻩﭖ ﻳﺎﻛﻰ ﺋﯩﺮﺍﻧﻠﯩﻖ ﺗﯜﺭﻛﻨﯩﯔ ﺩﻩﺭﺩﻯ، ﺧﯘﻱ ﭘﻪﻳﻠﻰ، ﺋﻪﻳﭗ ﻧﯘﻗﺴﺎﻧﻠﯩﺮﻯ ﭘﻪﺭﻗﻠﻪﻧﻤﻪﻳﺪﯗ. ﻣﯘﺳﺘﻪﺑﯩﺖ ﮪﯚﻛﯜﻣﺮﺍﻧﻠﯩﻖ، ﺋﺎﺩﺍﻟﻪﺗﯩﺴﺰ، ﭼﯩﺮﯨﻚ ﺋﯩﺠﺘﯩﻤﺎﺋﯩﻲ ﻛﻪﻳﭙﯩﻴﺎﺕ، ﻧﺎﻣﯘﯞﺍﭘﯩﻖ ﺟﻪﻣﺌﯩﻴﻪﺕ ﻗﯘﺭﯗﻟﻤﯩﺴﻰ ﻛﯩﺸﯩﻠﻪﺭﻧﯩﯔ ﺧﯘﻱ-ﭘﻪﻳﻠﯩﺪﻩ ﺋﻮﺭﺗﺎﻕ ﺋﯩﻨﺴﺎﻧﯩﻲ ﺋﻪﺧﻼﻗﻘﺎ ﺧﯩﻼﭖ ﮪﺎﻟﻪﺗﻠﻪﺭﻧﻰ ﭘﻪﻳﺪﺍ ﻗﯩﻠﯩﺪﯗ. ﻣﻪﺳﯩﻠﻪﻥ، ﺷﺎﯕﮕﺎﯕﻐﺎ ﭼﯩﻘﯩﭗ ﺑﺎﻗﻘﺎﻧﻼﺭ، ﺳﯩﻨﮕﺎﭘﻮﺭﺩﺍ ﻳﺎﺷﺎﭖ ﺑﺎﻗﻘﺎﻧﻼﺭ، ﺗﻪﻳﯟﻩﻧﮕﻪ ﺑﯧﺮﯨﭗ ﺑﺎﻗﻘﺎﻧﻼﺭ ﺧﻪﻧﺴﯘﻻﺭﻧﯩﯔ ﻳﺎﺧﺸﯩﻠﯩﻘﯩﺪﯨﻦ ﺗﻪﺳﯩﺮﻟﯩﻨﯩﺸﯩﺪﯗ. ﺷﯘﯕﺎ ﺑﯘ ﻳﻪﺭﺩﯨﻜﻰ ﺩﯨﻘﻘﻪﺗﻜﻪ ﺳﺎﺯﺍﯞﻩﺭ ﻣﻪﺳﯩﻠﻪ ﺑﯩﺮ ﻣﯩﻠﻠﻪﺗﻨﯩﯔ ﻗﺎﻧﺪﺍﻕ ﺋﯩﻠﻠﻪﺗﻜﻪ ﻣﯘﭘﺘﯩﻼ ﺑﻮﻟﻐﺎﻧﻠﯩﻘﻰ ﺋﻪﻣﻪﺱ ﺷﯘ ﻣﯩﻠﻠﻪﺗﻨﯩﯔ ﻗﺎﻳﯩﺴﻰ ﺋﯩﻠﻠﻪﺗﻠﯩﻚ ﺟﻪﻣﺌﯩﻴﻪﺗﺘﻪ ﻳﺎﺷﺎﯞﺍﺗﻘﺎﻧﻠﯩﻘﯩﺪﯗﺭ.

مەنبە: ئەجداد تورى