ئوقۇغۇچى بولدۇم ئالتمىش سەككىزدە

پىروفېسسور ئابدۇرەئوپ تەكلىماكانىي

* * * 

يىگىرمەنجى سىنتەبىر كۈنىدە،

ئىككى مىڭ ئون سەككىزىنجى سەنە؛

كەلدىم ئۇچۇپ كالىفورنىيەگە،

باشلاپ گويا ياڭى ھايات يەنە.

* * *  

بولدى قىبلەمىز مەشرىق تامانغا،

قالغاچ بەيتۇللاھ ئاشۇ تەرەپتە.

تىلىممۇ، پىكرىممۇ ھەم كۆڭلۈممۇ،

ئىش باشلادى ياپياڭى تەلەپتە.

* * *  

مەكتەپكە ماڭىمەن ئەرتىگەندە،

ئوقۇيمىز ھەر كۈنى ئىنگلىزچە.

تۇنجى كۈنىدە ئۆگرەندىم ئاران،

one, two, three دىن باشلاپ ten غىچە.

* * * 

قاتتى باشىمنىڭ ئىچى ھەم تاشى،

چەتئەل تىل ئۆگرەنىش تەرسلىكىدە.

داۋاندىن ئاشىشقا يەتمەدى كۆز،

ياشىم بولغاچ ساق ئالتمىش سەككىزدە.

* * * 

دەل مۇشۇ چاغدا كەلدى يانىمغا،

مەندىنمۇ قەرى بىر بوۋاي كۈلۈپ؛

«ئىسمىم كىيوشى، ياپونلۇق،-دەدى،

كلاسمەيتكەنمىز قويايلى تونۇشۇپ.

* * * 

سەكسەن سەككىزدە بۇ يىلى ياشىم،

سەندىن چوڭمەن ساق يىگىرمە سەنە؛

خاھلاساڭ ئەگەر دوستانە ھالدا،

بەھسلەشىپ باقساق تىل ئۆگرەنىشتە.»

* * *  

قوبۇل قىلدىممەن بۇ جەڭنامەنى،

كۆرمەگەچ راۋا تەسلىمنامەنى؛

تولغاندەك بولدى ۋۇجۇدۇمغا كۈچ،

ئالغاندا ئەسكە ئۇيغۇرنامەنى.

* * * 

ئاتلاندىم پۈتۈن جان-جەھلىم بىلەن،

باشقادىن تۈزۈپ تەپسىلىي پىلان؛

مۇڭداشىشنى قىلدىم ئاڭلىق ئادەت،

ئۆرنەك ساۋاقداش كىيوشى بىلەن.

* * * 

سىناپ باقسام، مۇتلەق قەرى ئەرمەس،

تۇتۇش قابىلىيەتى جەھەتتە؛

يادقا بىلۈر تۈم دۇنيا ئەللەرىن،

پايتەختلەرىنىڭ ناملارىن ھەتتا.

* * *   

دەيدۇر ئۇ: «قەرىدۇق ياش بويىچە،

كۈچىمىز يەتەلمەس قىرانلارغا؛

زىھنىمىزنى چىن ئۇرغۇتساق ئەگەر ،

ئۇلاشىمىز بىزمۇ ئارمانلارغا.

* * * 

ئارزۇيىمىز بىزنىڭ چوڭمۇ ئەرمەس ،

قوغلاشمايمىز چەندىن ئارتۇق زەپەر؛

بار ئىمكانچە بولۇپ تەندە ساغلام،

ھىچكىمگە يۈك بولماساق شۇ يەتەر؛

* * * 

ساغلاملىق دوراسىدۇر ئۆگرەنىش ،

ئىشەنگىنكى ئۇنىڭ تەڭداشى يوق؛

مىڭە ھۈجەيرەلەر ساق ھەمىشە،

زىھنىڭ ئىشچان، پىكرىڭ بولغاندا شوق.»

* * * 

چىنپۈتۈپ كىيوشىنىڭ گەپىگە،

كىتابلار ئىچىگە كىرىپ كەتتىم؛

ئۆگرەنىشنىڭ پايداسى نە قەدەر،

ئەمەلىيەتتىن نەق بىلىپ يەتتىم.

* * *  

سەھەر قوپۇمەن ئوخشاش سائەتتە،

شەنبە، يەكشەنبەلەرمۇ شۇ رەتتە؛

قىرائەت ئۈنلۈك، تەكىستلەر ياڭى،

كۆڭۈل راھەت مىسلى ئىبادەتتە.

* * *  

شۇنداقلار قىلىپ ئۆتتى ئىككى يىل،

مەردانە يۈرۈپ يەتمىشكە كىردىم؛

ئۆگرەنىش بىلەن ئۆتكەن ھاياتنى،

ئاللاھتىن بۈيۈك مۇكاپات بىلدىم.

* * * 

ھازىر بىراۋلار Hello, man  دەسە،

How are you  مۇ سەن دەيەلەر بولدۇم.

ئۆزۈم ئولتۇرۇپ كوچا  Bus لارغا،

دەڭىز Beach تامان يۈرەلەر بولدۇم.

* * * 

قىسقا ئىلتىماس، دوكلاتلار يازىپ،

ئۆزنى باشقاغا ئاڭلاتار بولدۇم؛

ياڭى تىل بىلەن ياڭى تەپەككۇر،

ياڭى ناخشالار ياڭراتار بولدۇم.

* * *  

ئۆتمەكتە كۈنلەر يارقىن، رەتىملىق،

ھەر ئەرتىگەندىن تاكى كەچكىچە.

دەلىللەپ ئۇيغۇر ئاتا سۆزىنى:

«ئۆگرەن بۆشۈكتىن تا تۆشۈككىچە».

* * *  

ئوقۇغۇچىدۇرمەن يەتمىش ياشلىق،

Miramar College in San Diego;

ھەمىشە چۈشۈمدە كاشغارىيە،

يۈرگۈدەكمەن ئۆرتەڭدە سان ساكو.

* * *  

تەبئيكى، بۇلۇتلار ئاراسىدا،

ھەر خەيرلىك ئىشنىڭ بىر داۋانى بار؛

بەلىڭىزنى چىڭ باغلاڭ رەئوپ باي،

بۇ ئىشنىڭ نۇسرەتلىك داۋامى بار!

* * * 

2020-يىل 20-سىنتەبىر، سان دىياگو  

ئىلاۋە: بۇ ئەسەر پىروفېسسور دوكتور ئابدۇرەئوپ تەكلىماكانىي تەرىپىدىن ئوتتۇرىغا قويۇلغان «ھازىرقى زامان ئۇيغۇر يازىقىنىڭ تەكلىماكان ئىملا قائىدەسى (لايىھە)» بويىچە يېزىلغان بولۇپ، ئاپتورنىڭ ئەمگىكىگە ھۆرمەت يۈزىسىدىن ئاكادېمىيە تور بېتىدە ئەينەن ئىلان قىلىندى.